SAPOS gavman bilong Papua Niugini na Australia i no stretim ol sekyuriti na infrastraksa long Daru, Western provins, bai ol narapela kantri olsem Saina bai putim han long en long bringim divelopmen i go long provins.

Dispela em toktok bilong meya bilong Daru, Samuel Winggu. Em i tok Western provins i no save kisim gutpela luksave long nesenel gavman inap planti yia nau.

Mista Winggu i tok gavman bilong PNG na Saina i bin sainim wanpela MOU we i gat plen long divelopim wanpela pis projek we bai bringim moa long 200 milien dola long Daru, tasol em yet wantaim ol lida long provins i no bin stap insait long dispela bung toktok namel long gavman bilong PNG na Saina.