NESENEL Kepital Siti aninit long lidasip bilong Gavana Powes Parkop i bin kamap long brukim graun long opim nupela K39 milien 4-Lane rot projek we bai kamap long Geheru.

Dispela em namba 3 rot projek nau bai kamap long Geheru wankain olsem narapela 2-pela bikpela rot projek we i bin kamap long 9-mail i go 14-mail na Laloki rot.

Dispela em soim patnasip namel long Gavana Powes Parkop na Praim Minista James Marape long go het wantaim infrastraksa divelopmen we pipel ken lukim sans bilong wok na apim ikonomi bilong kantri.

“Rot projek divelopmen em bikpela samting insait long siti na kantri wantaim bikos dispela i givim isi sevis long ol pipel husat i painim hat long go skul na wok wantaim,” Parkop i tok.

Dispela bikpela projek i kamap aninit long opis bilong NCDC wantaim sapot bilong Gavman na BSP benk long luksave na long nid bilong ol pipel, siti na kantri wantaim.

“Rot em bikpela sevis long laip bilong graun olsem na mi laik askim ol Geheru pipel husat i save slip kirap na long hia i mas sapotim dispela projek na wok bung wantaim olsem wanpela famili bikos dispela sevis em bilong yumi olgeta,” Parkop i tok.

“Mipela olgeta memba bilong wan wan hap insait long NCD i wok strong long bringim kain ol bikpela divelopmen kam insait long siti na kantri wantaim, tasol mipela nidim tu bikpela sapot bilong olgeta  pipel long bungim han wantaim na senisim dispela kantri.

“Long hap we tripela bikpela rot projek bai kamap em bai kisim ol wok manmeri bilong dispela ol hap long kamap papa na go pas wantaim ol kontrekta long divelopim dispela projek,” em i tok.

Minista bilong Haus Komisin na Memba bilong Mosbi Sauts Justin Tkatchenko i tok: “Nau em taim bilong divelopmen na pusim ikonomi bilong yumi go het long strongim dispela projek i kamap gut.”

Parkop i salensim pablik long lukautim gut siti na i no ken yusim olsem rabis ples na tu spetim buai long olgeta hap bikos dispela em bikpela projek divelopmen we i lukim nupela 4-Lane rot.

Jacklyn Kimala i raitim