OL tokpait i kamap namel long wanpela loging kampani long ol papagraun bilong Collingwood Bay long Oro provins.

Andrew Yabara wanpela sampla komyuniti lida long ples Musa long graun bilong ol Guruguru pipel i bin putim ol tumbuna tambu mak, tasol kampani i bin rausim ol dispela na i laik go insait long bus bilong ol na katim timba.

Mista Yabara i tok ol i kisim olgeta ripot na givim long ol non gavman oganaisesen (NGO) na tu opis bilong Gavana Gary Juffa long lukluk long en.

Long dispela wik, Gavana Juffa i toktok strong long dispela pasin we ol iligal loging kampani i save go insait long provins na mekim ol stil pasin.

Mista Juffa i tok em i gat bilip olsem dispela kampani i no kisim loging laisens long katim timba long dispela eria.

Vais Siaman bilong PNG Fores Atoriti bod, Kenn Mondiai i tok ol i kisim ripot long dispela hevi namel long ol papagraun na loging kampani na dispela hevi i stap nau long kot.