MOA long 2500 manmeri i kamap long amamasim Krismas tai mol i singim ol Krismas karol (singsing) long Madang Resort na Madang Rotary Klab long Sugen Aben Pak long las wik Sarere nait.

Amamas bilong dispela nait i stat wantaim Henry Manago, wanpela sumatin long Divine Word Yunivesiti long Madang we em i tokaut long mining bilong Krismas.

Em i tok Krismas i taim bilong famili i bung wantaim na amamas.

Inap long 20 grup i kamap na singsing na kamapim ol pilai na danis.

Namel long dispela ol grup em wanpela papet so we Kanagio Ben i singsing pulim Santa “Clause” i go insait long grup.

Santa Klaus i givim ol loli long ol pikinini na bihainim givim awot long ol lain husat i kamapim ol gutpela pilai.

Wanpela Filipino kwaia grup i kamap singim ol Krismas karol tu.

Dispela so i bin fri we i no gat sas long em.

Sir Peter Barter, Menesing Dairekta bilong Madang Resort i tok em i kirap nogut long lukim planti manmeri i kamap long dispela so.

Em i tok bikos long hevi bilong coronavirus (COVID-19) em i ting liklik lain tasol bai kamap tasol dispela i no tru.

Em i tok olgeta krismas, Resort i save kamapim kain ol pilai na em i bilip, amamas bilong neks yia bai i bikpela moa.

Em i amamas na tok tenkyu long olgeta lain husat i kamap na soim ol pilai na singsing bilong ol.