BIPO Komo em ples we pait i save kamap namel long ol wanpisin. Ol man i save karim naip na gan raun na ples i no seif tumas.

Bikos long dispela, planti manmeri na pikinini i bin lusim Komo na go stap long ol narapela ples.

Sampela yangpela mangi long Komo i bin stap bek bikos ol i bin laik lukautim ples. Wanpela bilong ol em Morris Edwin, husat i bin lukim ol hevi olsem pait na guria i bin kamap na bagarapim sindaun bilong ol pipel long Komo.

Nau Morris i save go pas long ol yut long mekim ol projek we i wok long kamap. Em i save go wok wantaim ol NGO, kisim save na bringim  i kam bek long ol yut bilong em na skulim ol.

“Long dispela taim mipela i stap long hevi, mipela i no bin kisim helpim long gavman, nogat tru. Ol meri na pikinini i no bin seif, ol i no go long skul, ol meri i no inap raun nambaut. ExxonMobil i bin helpim mipela gut wantaim sekyuriti bilong ol. Olsem na nau i gat bel isi long Komo,” Mista Morris i tok.

Wantaim dispela helpim bilong ExxonMobil, ol yut i kisim gutpela tingting na daunim tingting bilong pait. Na ol i kamap wantaim het tok “Drop the weapon and pick up the ball” o “Lusim gan na kisim bal”.

Ol yut i sanap strong long pilai ragbi na wokim wanpela projek bilong lukautim ol pis. Ol i amamas tru olsem ExxonMobil i sapotim ol wantaim ol projek bilong ol.

“Mi tok tenkyu tru long ExxonMobil. Dispela em namba wan taim mipela i lukim dispela kain divelopmen i kamap long ples bilong mipela. Ol yut i wok hat long kamapim gut pis pon projek,” Morris i tok.

Em i tok moa olsem, ol mama nau i gat inap mani bikos ol i save salim ol kaikai long taim gem bilong ragbi i on. Dispela em gutpela sans tru bilong pipel long mekim mani.

“Mi tok tenky tu long ol husat lain i bin putim han long helpim Komo i kamapim bel isi na lusim pasin bilong pait namel long ol wanpisin,” Morris i tok.

Carolyne Ketsimur i raitim