OL pipel i mas votim planti lidameri i go insait long ol pablik opis long makim ol komyuniti bilong ol bikos ol i gutpela menesa, wanpela meri i tok.

Meri wod memba bilong Wod 7 bilong Ahi Lokol Level Gavman (LLG) insait long Lae distrik long Morobe Provins, Domba Galang i mekim dispela toktok long as em i laik resis long sia bilong kaunsil.

Misis Galang i tok insait long olgeta viles long kantri ol meri em ol gutpela menesa na winim ol man bikos ol save gut long menesim hevi bilong famili bilong ol na tu ol i save stretim hevi bilong ol arapela tarangu manmeri bilong klen bilong ol na dispela gutpela pasin i save mekim olgeta manmeri insait long viles i wanbel na stap amamas.

Em i tok planti taim ol man wod memba i no save luksave long ol nid, wari na hevi bilong ol meri bikos ol i lukim ol meri olsem samting nating na dispela i save givim hevi long ol sevis ol wod memba i givim long ol wod bilong ol insait long ol LLG.

“Tasol mi bilip ol meri, mipela i ken bringim senis bikos mipela ol meri i save mekim long ol famili,” Galang i tok.

“Na taim mi tok long ol famili lukluk long bikpela piksa mipela ol meri ken mekim ol wok, mipela i ken bringim senis i go long komyuniti.

“Mi laik bringim senis na mekim olgeta manmeri insait long viles amamas olsem na mi sanap long ileksen long kamap wod memba.”

Galang, husat i gat 63 krismas na i wok pastaim olsem sekenderi skul tisa, i tok em i lukim ol man wod memba i paulim ol pablik mani gavman i makim bilong ol komyuniti projek tasol ol paulim na i no bringim ol sevis go insait long viles.

Dispela i kirapim tingting bilong em long kamap kaunsil memba na helpimgut olpipel bilong em.

Em i tok maski ples bilong em Wagang i stap insait long Wod 7 eria namel long Lae Siti, komyuniti bilong em i sot yet long kisim gut ol bikpela sevis olsem wara, pawa, edukesen na helt na ol arapela sevis long strongim sindaun bilong ol.

 “Mipela wokabaut 5 kilomita go insait long bus long kisim klinpela wara. Mipela i stap insait long siti tasol sevis i no kam gut.

“Mipela laikim tru wanpela elementeri skul long ples bikos ol skul pikinini husat krismas  bilong ol i stap long 4 na i go long 7 i save wokabaut 5 kilomita go long wanpela elementeri skul,’’ Galang tok.

Dispela pastaim tisa i tok maski ol komyuniti i save bungim ol dispela hevi, lo na oda isu tu i save mekim ol i stap wantaim hevi.

Em i laik stretim wok bung wantaim Ahi LLG na Lae distrik edministresen long stretim lo na oda hevi olsem ol manmeri i ken sindaun gut.

Willie Brul i raitim