MEMBA bilong Mosbi Not Wes, Sir Mekere Morauta i dai long haus sik long Brisben, Australia long las wik Sarere.

Em i bin sik sampela taim na i go stap long haus sik long Brisben.

Meri bilong em Ledi Roslyn na pikinini man bilong em, James i tokaut long dai bilong em.

Lotu bilong em i kamap long  St Mary’s Anglikan Sios, Kangaroo Poin long asde apinun.

Bikos long hevi bilong coronavirus (COVID-19) famili i no inap long kamapim wanpela haus krai.

Tasol famili i lukluk yet long holim memorial lotu long Pot Mosbi long bihain taim long stat bilong neks yia.

Planti manmeri i salim tok sori long famili bilong Sir Mekere bihainim. Namel long ol em Praim Minista James Marape na Oposisen lida Belden Namah.

Sir Mekere i gat nem long wok bilong menesmen na kamapim ol senis long wok bilong politik na pablik sevis.

Em i kamap praim minista long 1999 long taim kantri i bungim bikpela hevi long ikonomi na klostu i bruk daun.

Planti kam man long narapela kantri i lusim PNG na i go long kantri bilong ol yet.

Mama i karim Mekere long Kukipi long Malalaua Distrik, Galp Provins long 1946 na em i dai long taim em i gat 74 krismas.

Em i namba wan man long kantri long kisim Digri long Ikonomiks na i namel long ol arapela Papua Niugini man olsem Sir Rabbie Namaliu na Sir Anthony Siaguru long greduet long Yunivesiti bilong Papua Niugini.

Em i namba wan man long kamap Fainens Seketeri na bihain em i kamap Menesing Dairekta bilong Papua Niugini Benking Kopresen, nau Benk Saut Pasifik (BSP).

Bihain long dispela em i kamap Gavana bilong Sental Benk.

Em i resis na winim Mosbi Not Wes sia long 1997 Jeneral Ileksen.

Em i kamap praim minista long 1999 bihain long kamap biong Vot i Nogat Bilip long gavman bilong Sir William (Bill) Skate.

Em i stap praim minista inap long 2002 Jeneral Ileksen.

Em i ritaia long wok politik long 2012 tasol i go insait long politiks gen na winim sia bilong Mosbi Not Wes long 2017 Jeneral Ileksen.

Em i stap Memba bilong Palamen inap em i dai long las wik Sarere.

Long 2012 ol lida long Pasifik Ailan Forum (PIF) i makim em olsem “Eminent Person” o man i gat save long rivium Pasifik Plen.

Dispela ripot em ol i prinim long buk long 2013.

Long 2012 yet gavman i makim Sir Mekere long kamap Siaman bilong PNG Sastenabel Divelopmen Program kampani (PNG SDP).