OL pipel bilong Bamu long Midel Fly distrik long Western provins i redi long mekim bikpela bung long taim bilong Krismas lotu.

Tasol dispela bung bai i no wankain olsem ol narapela Krismas i go pinis, long wanem ol meri long komyuniti bai beikim krismas kek bilong wan wan famili bilong ol yusim saksak flawa. Saksak o hevenat long Solomon Ailan em i wanpela kaikai bilong ol pipel long dispela provins.

Edith Wagi em wanpela lida meri long Bamu na em i tok ol i lainim planti samting long mekim wantaim saksak we bipo ol i no save long en.

Alice Makau em bilong Bamu tu na em i tok planti mama na ol yangpela meri tu i stap insait long skul bilong lain long mekim flawa long saksak na nau bai ol i kukim krismas kek na bungim ol komyuniti bipo Krismas.

Fr Mateus Juang em i go pas long mekim ol dispela trening wantaim ol meri long Bamu na em i lainim ol man tu long planim rais.

Em i tok Krismas lotu bilong ol bai bungim ol pipel long ol wan wan hauslain long luksave long ol tumbuna bilong ol long bipo na tingim lotu bilip bilong ol long dispela taim.