Divisenal Komanda bilong NCD, Asisten Komisina bilong Polis Anthony Wagambie Jr i tokim ol taun Polis stesin aste olsem ol bai arestim na sasim husat polisman o polismeri i giaman na no mekim wok polis stret.

Planti ol toktok i kam long pablik olsem ol polis save kisim ekstra sas mani long ol draiva bilong ol kar.

ACP Wagambie Jr i bungim ol polis man na meri na tokim ol long stat rausim ol husat polis man o meri i bagarapim nem bilong stesin stap long taun.

I gat planti ol polis man i save mekim wok gut tasol ol liklik namba tasol no save mekim wok stret na bagarapim nem na bilip bilong ol pablik long polis.

ACP Wagambie Jr i givim strongpela toktok olsem, sapos wanpela bilong ol polis man o meri giaman na sasim ekstra mani long ol draiva em i bai pinis long wok na bai go lo kalabus.

Tingting bilong ACP Wagambie em long apim level bilong polis sevis i go antap tasol polis wok man long taun i no bihainim Koperet standet bilong PNG.

So long kamap long dispela level, ol polis man na polis meri mas mekim wok gut.

ACP Wagambie i singautim ol taun polis man na polis meri long mekim wok bilong ol stret na kisim bek bilip bilong ol pablik long wok polis.