NUPELA Minista bilong Jastis, Brian Kramer i strongim ol wokmanmeri bilong Dipatmen bilong Jastis na Atoni Jeneral (DJAG) long wok smat na wok kwik.

“Yupela i mas givim yupela yet long mekim gut wok bilong yupela. Mi harim olsem yupela i gat planti hevi na salens insait long dipatmen olsem na mi laik strongim yumi olgeta long wok smat na wok kwik na pinisim ol dispela hevi na muv i go het long narapela hevi na wokmak,” Minista Kramer i tok.

Em i mekim dispela tok bihain long Seketeri bilong DJAG na Atoni Jeneral bilong Papua Niugini Dokta Erik Kwa i tok welkam na toksave long Brian Kramer olsem DJAG i gat planti salens na hevi na i nidim helpim.

“Mi save laik long mekim wok tasol, mi no save laikim ol pablik holide bikos mi no save mekim wok long ol dispela taim. Tasol nau em i no gutpela taim bilong kisim holide, bihain taim bilong ol pikinini bilong yumi bai bagarap sapos nau yumi no mekim gut wok. Kantri i no stap gut. Kainkain pasin bilong politiks i kamap na yumi stap nambaut nambaut olsem na nau mi kamap Minista bilong Jastis mi laik mekim wok na pinisim sampel hevi na salens bipo long gavman i rausim dispela wokmak long mi.

“Yupela (ol wokmanmeri bilong DJAG) i mas tingting strong na wok kwik na wok smat na bai yumi i ken daunim ol hevi na salens bilong dipatmen,” Minista Kramer i tok.

Em i tok nau yet namba wan wokmak em i laik mekim bipo long nupela yia i kam em stretim ICAC lo na mekim olgeta ekting posisen long dipatmen i kamap pemenen. Em i bai lukluk long ol narapela samting olsem pe bilong ol viles kot opisal na ol arapela bihain long dispela.

Rebecca Negere i raitim