DIPATMEN bilong Jastis na Atoni Jeneral (DJAG) i wanbel na i tok amamas na welkam long nupela Minista bilong Jastis, memba bilong Madang, Brian Krammer.

Dokta Erik Kwa, Seketeri bilong DJAG na nupela Atoni Jeneral bilong kantri i tok tenk yu long Praim Minista James Marape long makim Brian Kramer olsem Minista bilong DJAG.  

“Mipela i amamas tru long Gavman bilong Marape Basil i givim mipela Brian Kramer olsem Minista bilong Jastis,” Dokta Kwa i tok.

Em i makim maus bilong DJAG na i tok tenkyu long  Praim Minista James Marape long givim wanpela man husat i save pait strong na totok planti long jastis, husat i smat moa na husat i gat bel long ol pipel na i save makim maus bilong ol pipel gut tru.

Dokta Kwa na DJAG i bin tok welkam long nupela Minista bilong Jastis, Brian Kramer long Mande. Dokta Kwa i tok ol i no tok welkam long Brian Kramer yet na em i statim ol wokmak bilong en pinis.

“Mipela i laikim ol dispela kain lida husat i hangre tru long mekim wok long developim kantri na helpim ol pipel,” Dokta Kwa i tok.

“Wantaim gutpela save na expiriens bilong en olsem Polis Minista bipo, mipela i amamas long em bai kamap Minista bilong Jastis.”

Dokta Kwa i tokim Minista Kramer olsem em i nau gat bikpela nupela wokmak na em i bai lukautim moa long 20 tausen pablik sevan.

Minista Kramer i tok tenk yu tu long Praim Minista James Marape long sosel midia olsem em i makim em nupela Minista bilong Jastis na em i tok amamas long nupela Minista  bilong Polis, Wiliam Onglo.

Rebecca Negere i raitim