OL memba bilong palamen i bagarapim ol manmeri long dispela Krismas, Opis bilong Katolik Bisop Konprens (CBC) bilong Papua Niugini na Solomon Ailan i tok.

Jeneral Seketari bilong CBC, Pater Giorgio Licini, i tok dispela krismas i no gat gutpela amamas bikos ol memba i pasim helpim i mas go long stretim sindaun bilong manmeri.

Em i mekim dispela tok long Krismas toktok bilong em.

Em i tok taim ol manmeri i laik amamasim krismas long tingim de Mama karim Jisas, Sevia bilong yumi, ol memba bilong palamen i hait, slip long hotel na pait i go kam long kisim pawa.

Em i amamas long gavman i traim long helpim ol manmeri long banisim ol yet long kamap bilong coronavirus (COVID-19) tasol dispela i no inap.

 “I no gat wanpela man i save yumi bai pinisim yia olsem wantaim hevi bilong COVID-19 na pilai politik,” Pater Giorgio i tok.

“Em i bikpela sem taim ol memba bilong palamen husat i gat gutpela sindaun i pasim helpim ol arapela ogensaisen i laik givim.

“Ol manmeri i bungim yet ol hevi long olgeta de long ol i gat gutpela helt, edukesen na ol bikpela sevis ol i mas i gat.

“Mipela i pinisim dispela yia long narapela kain wei.”

Pater Giorgio i tok Papua Niugini i no kisim bikpela hevi olsem ol arapela kantri long COVID-19 tasol em i bungim hevi long sampela rot.

Ol hevi bilong olsem helt, edukesen, trenspot, manmeri lusim wok na ol arapela bikpela sevis we ol manmeri i sot.

Em i tok ol arapela hevi tu i stap olsem jenda bes vailens (GBV), “Sorcery Accusation Related Violence (SARV) na rot bilong gavman helpim ol manmeri i hevi bilong Klaimet Senis.

Tasol em i tok maski long dispela ol hevi, wanpela bebi i slip long mensa na i bringim hop i kam long manmeri.

Em i tok dispela hop ol manmeri i wet em bebi Jisas, Virgo Maria i karim long Betlehem long taim ol angelo i sing “Glori i go long God i stap antap,” (Lk 2:14).

“Harim. Wanpela meri i no bin slip wantaim man, em bai i gat bel na i karim wanpela pikinini man. Na bai ol i kolim nem bilong en Emanuel.”

As bilong dispela nem i olsem, God i stap wantaim yumi (Matyu 1: 23).

Em i tok maski kain kain hevi i kamap, amamas bilong yumi i gat strong na i winim dispela strong bilong COVID-19 na pasin nogut bilong ol memba.

Em i tok wantaim strong, manmeri i mas lukluk long 2021 wantaim hop.

Paul Zuvani i raitim