WANPELA biknem jenelis i no amamas long ol Memba bilong Palamen i lusim nating taim bilong kamapim wok.

Anna Solomon husat i bin stap Jeneral Menesa na Edita bilong Word Publishing Co i tok planti ol gutpela samting i bin inap long kamap namel long Novemba na Desemba tasol dispela sans i lus.

Em i tok dispela soim ol memba i tingting long stap bilong ol tasol na i no tingting long ol manmeri i votim ol.

“Sindaun nau yu lukim i soim ples klia tingting ol memba bilong palamen i gat,” Solomon i tok.

“Memba i no stap long makim ol manmeri na mekim ol wok long strongim sindaun bilong ol pipel.

“Kain politik pilai i lukim ol manmeri i lus long kisim ol bikpela sevis olsem helt na edukesen.

“Ol memba i westim bikpela mani bilong kantri tu long baim ol hotel na ran bilong ol balus na kar long i go kam wantaim ol hotel em ol memba i slip long ol.”

Long wankain taim Jeneral Seketari bilong Katolik Bisop Konprens (CBC) bilong Papua Niugini na Solomon Ailan, Pater Giorgio Licini i tok ol memba bilong palamen i bagarapim ol manmeri long dispela Krismas, Opis bilong i tok.

Em i tok dispela krismas i no gat gutpela amamas bikos ol memba i pasim helpim i mas go long stretim sindaun bilong manmeri.

Fr Licini i mekim dispela tok long Krismas toktok bilong em.

Em i tok taim ol manmeri i laik amamasim krismas long tingim de Mama i karim Jisas, Sevia bilong yumi, ol memba bilong palamen i slip long hotel na pait i go kam long kisim pawa.

Em i amamas long gavman i traim long helpim ol manmeri long banisim ol yet long sik coronavirus (COVID-19) tasol dispela i no inap.

 “I no gat wanpela man i save yumi bai pinisim yia olsem wantaim hevi bilong COVID-19 na pilai politik,” Pater Giorgio i tok.

“Em i bikpela sem taim ol memba bilong palamen husat i gat gutpela sindaun i pasim helpim ol arapela ogensaisesen i laik givim.

“Ol manmeri i bungim yet ol hevi long olgeta de long ol i gat gutpela helt, edukesen na ol bikpela sevis ol i mas i gat.

“Mipela i pinisim dispela yia long narapela kain wei.”