GAVMAN bilong Praim Minista James Marape i stap strong yet.

Dispela i kamap ples klia long asde palamen kibung.

Bai i nogat Vot i Nogat Bilip (VONC) na Oposisen kendiet bilong Praim Minista, Patrick Pruaitch i lus.

Palamen asde i suruk i go long 20 Epril, 2021 long bung gen.

Wantaim dispela palamen i bin tok orait gen long K19.6 bilien Mani Plen bilong 2021.

Dispela em bihain long moa long 10-pela memba bilong gavman i lusim Oposisen sait na i go long gavman long palamen kibung long asde.

Namel long ol em pastaim Deputi Praim Minista na Memba bilong Bulolo, Sam Basil, Sir John Pundari husat i Memba bilong Kupiam-Ambum, Nick Kuman husat pastaim i Minista bilong Haia Edukesen (Gumine), Westley Nukundji husat pastaim i Minista bilong Imaigresen na Boda Sekyuriti (Dei), Joseph Yopyyopy (Edukesen) Memba bilong Wosera Gawi, Gavana bilong Madang Peter Yama, Chris Nangoi (Sumkar MP) husat pastaim i Minista bilong Koreksinel Sevis, Gavana bilong Wes Nu Briten na pastaim Minista bilong Pablik Entraprais, Sasindran Muthuvel, Kevin Isifu (Wewak) na Douglas Tomurieasa (Kiriwina- Good Enough).

Basil i go sindaun klostu long Marape na dispela i soim olsem Basil i kisim bek sia olsem Deputi Praim Minista.

Dispela i mekim na gavman i bin inap long tok orait 2020 K19.6 bilien Mani Plen.

Dispela mani plen em Suprim Kot long 9 Desemba disisen i bin tok nogat long em.

Em bikos gavman i bin gat 50 memba tasol long vot we i no kisim “absolute majority” 56 memba long mekim i kamap lo.

Moa yet gavman i no bin givim inap taim long Oposisen i stap long kibung na vot. Dispela long wanem ol i stap long kem long Vanimo, Wes Sepikt Provins.

Tasol asde bikos gavman tupela sait wantaim i bin stap, gavman i bin inap long tok orait long 2021 baset.

Maski long Tresera Ian Ling-Stuckey i tokaut long baset, Oposisen lida Belden Namah na Deputi bilong em Dokta Allan Marat wantaim ol arapela Oposisen i protes na go aut na i no stap insait taim Stuckey i toktok.

Ol i tok dispela baset i no stret na i asua bikos Suprim Kot i tok no gat long em.

Tasol gavman i tok dispela nau i senis bikos gavman nau i gat namba long tok orait long em.

Gavman i putim bek tu ol memba long Pemenen Palamenteri Bisnis Komiti i go bek olsem ol i ken tokaut long ol ajenda palamen bai toktok long ol.