LONG Tunde, Suprim Kot i rausim eplikesen bilong slip rule, em Atoni Jeneral, Pila Niningi na Spika bilong Palamen, Job Pomat  i bin putim. Tupela i bin salensim disisen bilong Suprim Kot long 9 Desemba we kot i tok Spika bilong Palamen i no bihainim konstitusen long taim em i singautim palamen long bung long 17 Novemba 2020.

Ol 5-pela jas em Sif Jastis Sir Gibs Salika i go pas long en, i askim Jastis David Cannings long ritim disisen bilong ol jas long rausim dispela Slip Rule eplikesen.

Kot i tok i no gat as bilong dispela eplikesen na i tokim tupela lain husat i bin putim dispela eplikesen long baim kost bilong dispela kot.

Loya bilong Atoni Jeneral, Nemo Yalo na loya bilong Spika, Loani Henao i bin givim tripela poin bilong dispela eplikesen bilong ol. Ol i tok ol de i stap long disisen bilong kot i krangki, namba tu poin em Belden Namah i bin asua long muvim mosen long adjenim Palamen, na namba tri poin em seksen 104 (3) bilong konstitusen i lukluk long mining bilong “miting” na “siting” bilong Palamen bihain long Namah i adjenim siting i go long 18 de, we i winim 12-pela de aninit long dispela hap bilong konstitusen.

Kot i tok namba wan poin em i asua long taim ol i taipim ripot na ol i stretim pinis na salim i go long rekot bilong PacLii websait olsem na i no gat as bilong tok. Kot i tok long namba tu poin, ol i bin gat planti tingting tasol i no gat as bilong tok bikos Palamen i bin vot long adjenim bung bilong ol.

Kot i rausim namba tri poin bikos em i nupela samting na ol tupela lain i no bin putim long ol sabmisen bilong ol bipo long kot olsem na kot i no inap lukluk long en.

Kot i tok tu olsem ol tupela lain i no bin salensim disisen bilong kot long bihainim konstitusen o nogat

Kot i tok dispela eplikesen i no inap win bikos em i no gat gutpela as olsem na ol i rausim.