PAPUA Niugini nau i rekotim namba 8 indai long COVID-19.

Dispela indai i kamap long wanpela man long Wes Nu Briten, krismas bilong em 49.

Dispela man i bin go long haus sik na komplen long bel pen, kus, het pen na sotwin.

Nau rekot bilong COVID-19 long PNG em 725 keis olgeta na namel long en 8-pela indai i kamap pinis.

Long las wik i kam Wes Nu Briten na Westen Hailans i rekotim ol nupela keis. Westen Hailans i rekotim 5-pela nupela keis. Wes Nu Briten i rekotim 35 na 34 bilong ol em long Talasea distrik. Narapela wanpela em wanpela nesing opisa long Gloucester distrik.

 Namel long olgeta nupela keis em wanpela pikinini meri i gat eit krismas. Ol arapela em 8-pela sumatin, 7-pela helt woka na wanpela sekyuriti gad.

Planti dispela ol nupela keis ol i painim long kontek tresing na tu long bikpela wok testing.

Kontrola bilong COVID-19 Nesenel Pandemik David Manning i tok, “Namba bilong COVID-19 keis i wok long go antap nau long dispela taim long wanem wok bilong kontek tresing i ran strong nau. Ol risal i soim olsem birua bilong COVID-19 i stap pinis long ol ples bilong yumi, na yumi no ken lus tingting na stap nabaut. Yumi mas was olgeta taim.

“Plis bihainim yet ol helt protokol bilong COVID-19. Yusim han senitaisa o wasim han olgeta taim wantaim sop. Putim pesmask taim yumi stap long pablik ples na stap longwe long ol bikpela bung.

“Yumi mas risponsibel. COVID-19 i stap pinis. I nogat marasin yet bilong dispela sik olsem na namba wan rot bilong banisim o abrusim dispela sik em long bihainim ol helt protokol.”