BAINING manmeri husat i stap klostu long Yalam Primeri skul i no amamas long ol edukesen wok lain i no kamap long Yalam primeri skul greduesen las wik.

Lidaman bilong Baining James Tapele i tok olsem ol i salim pas long askim Gazelle distrik i edministresen na edukesen opisa long kamap long namba 11 Gret 8 greduesesn bilong Yalam praimeri skul tasol ol i no kamap.

Moa yet, em i tok olsem dispela kain pasin i no gutpela na tu i no go daun gut wantaim laik nating bilong manmeri long Yalam komyuniti.

Tapele i tok olsem nogat rot i go long Yalam komuniti skul tasol ol tisa na sumatin i save bihainim bus rot long kamap  long skul.

Em i tok ol tisa na sumatin i save wokabaut, na ol edukesen woklain i ken wok hat tu.

Ol lida man mas kamap long greduesen bihainim bus rot na lukim ol kain hevi ol pipel i save karim, Tapele i tok.

Em i tok tenkyu long sampela lida husat i kamap long greduesen na tu long lukim op bilong tri-in wan klasrum.

Tapele i tok sampela ol lidaman i pret long kam long dispela hap.

Moa yet em i tok yupela ol woklain bilong gavman mas kam na lukim hevi ol pipel i karim na stretim rot bai nupela divelopmen bai kamap.

Em i tok i gat mani i stap long ol i pulim ol timba o diwai bilong ol na ol i ken kisim sampela dispela mani na wokim rot bilong ol long mekim laip bai isi long ol.

Long wankain taim em i tok olsem ol gavman wok lain long Gezelle distrik i no ken givim ekskius na wokim politik.

Em i tok ol i man, wankain olsem ol long kisim sevis.

Tapele i tok planti lain long arapela kantri na PNG raun i kam lukluk long mipela ol bai pinis na laik wok bisinis wantaim mipela, tasol mipela i no laik long sainim tok orait wantaim ol.

Em i tok ol i painim hat taim tasol ol i no inap givap Tapele.

Moa yet, em i tok maski gavman i no givim helpim, ol bai wok hat long kisim sevis i go long ol komyuniti bilong ol long kamapim gutpela sindaun bilong ol.

Michael Novingu i raitim