SANDE skul i gutpela ples we pikinini i ken lainim gut tok bilong God, wanpela senia pasto i tok.

Pasto Ainge Jonathan bilong Evanjelikal Luteran Sios (ELC) long Bulolo, Morobe Provins i tok long taim kongresen bilong em i bung long opim wanpela elementeri skul long Bulolo long las wik.

Em i tok i gat planti rot em papamama i ken bihainim long lainim pikinini long kamap gut na wanpela bilong ol rot em long salim pikinini i go long Sande Skul.

Em i bihainim rit long Buk bilong Gutpela Sindaun (Proverbs) 22: 6 we i tok long pasin bilong lainim pikinini long kamap gut.

Em i tok pikinini yet i no inap lain gut inap papamama i lainim em long pasin bilong skelim tingting na mekim samting gut.

Pasto Ainge i tok Jisas yet i tok long larim ol pikinini i go long em. Long Gutnius bilong Metyu 19:13-15 sampela disaipel i pasim ol pikinini tasol Jisas i tokim ol long ol i mas lusim ol pikinini i go long em.

Jisas i tok, “Larim ol pikinini i kam long mi. No ken pasim ol. Bikos Kingdom bilong Heven i bilong dispela kain ol lain.”

Pasto Ainge i tok tu olsem 1 Timoti 4: 10-11 i tok long papamama i mas wok hat long skulim pikinini olsem hop bilong yumi ol manmeri i stap long God na Jisas husat i “Saviour” bilong yumi.

“Yupela papamama i no ken pasim ol pikinini o lusim ol i stap nating bikos Sande Skul i gutpela ples bilong pikinini i lain na save long God,” Pasto Ainge i tok.

Bulolo Elementeri skul Kondineta Simaki Gioba i bin gat hevi wantaim mani na ol risos long statim skul tasol bihain long dispela ol i kisim gutpela sapot long komyuniti.

Dispela elementeri skul i wanpela hap han bilong Sande Skul.

“Husat papamama o manmeri i givim sapot long skul, mipela i tok tenkyu,” em i tok.

“Dispela wokabaut bilong lainim pikinini gut i no isi rot tasol wantaim strong bilong God mipela i ken mekim.”

Em i tok pikinini i mas lainim samting long strongim bodi na long strongim spirit long tok bilong God.

Paulus Tali i raitim