MOA long 290 man i pas aut long Goldie ami trening kolis ausait long Pot Mosbi long las wik Trinde.

Ol i greduet bihain long 11 mun.

Dispela i bikpela namba moa long mak ol i bin kisim long ol yia bipo.

Namba bilong ol manmeri i go long kisim trening i bin bikpela tasol i go daun bihain long sampela bilong ol i no bin mekim gut long trening bilong ol.

I gat save tu olsem ol trena i rausim sampela ol treni opisa bikos i gat asua long skul setifiket bilong ol.

Bikpela namba bilong ol treni opisa i kam long Hailans rijon na bihain em Momase, Niugini Ailan na Sauten rijon i bin i gat foapela tasol.

Minista bilong Difens, Saki Soloma i givim strongpela toktok long ol nupela soldia olsem ol i mas mekim wok bilong ol gut olsem wanpela soldia i makim kantri.

Em i tok tu olsem nem bilong ami i wok long bagarap long sampela liklik lain husat i no bihainim lo.

Em i tok dispela kain lain i no fit long stap long ami.

Ol dispela 290 nupela soldia bai wetim posting bilong ol long go long wanem bareks o kampani ol bikman bilong ami i makim.

Nicky Bernard i raitim