POLIS long Is Nu Briten i givim tok lukaut long ol manmeri long no ken bikhet na brukim lo.

Provinsal polis komanda, Joesph Tabali i tok polis bai givim bikpela mekimsave long husat i no harim tok na bihainim lo.

Em i mekim dispela tok long las wik taim em i redim polis long kamapim krismas na nu yia operesen.

Em i tok polis i laikim manmeri na komyuniti i mas stap seif na amamas long dispela taim bilong sisen.

Polis operesen i gat tripela hap, namba wan hap i bin stat long 25 Novemba na i pinis long Novemba 29 na namba tu hap i bin stat long 30 Novemba na bai pinis long 20 Desemba na namba tri hap bai ran olgeta long Janueri, 2021.

Dispela operesen i stat long tripela polis stesin long Kokopo, Rabaul na Kerevat long karimaut operesen bilong ol yet.

Tabali i tok ol polis komanda long Kokopo, Rabaul na Kerevat bai lukautim wok bilong ol yet bikos ol i save long ol ples we i stap nogut.

Polis bai wok long sekim ol kar, holimpas ol lain i karim spak brus, hombru na ol arapela samting nogut.

Tabali i tok moa yet, ol bai karimaut lo bilong coronavirus (COVID-19) tu.

Em i tok polis bai patrol long boda mak bilong Is na Wes Nu Briten long ol manmeri i mas bihainim ol lo bilong COVID-19 olsem sik i no ken go bikpela.

Em i tok ol lain i kam long WNB long Kokopo i mas kisim tok orait pepa long helt atoriti long Kimbe long go insait long Is Nu Briten.

Tabali i askim manmeri long amamasim Krismas na Nu Yia insait long haus o banis bilong ol na I no ken aut long pablik na kamapim hevi.

Em i tok polis mekimsave long husat manmeri i brukim lo.

Michael Novingu i raitim