ALAENS bilong ol sios lida egensim korapsen na alaens bilong human rait i singaut long olgeta sitisen bilong Papua Niugini long sanap long strong luksave na ripotim olgeta kain korapsen na abyus long human rait insait long kantri.

Ol i mekim dispela singaut long wanpela bung ol i bin holim long Pot Mosbi las wik long luksave long bikpela de bilong human rait.

Tupela alaens i tok strong olsem em i taim ol politikel sistem bilong PNG i kisim nupela rot long stretim hevi bilong korapsen na human rait long kantri.

“Yumi mas stretim ol samting i no stret na kamapim ol strongpela polisi straksa na ligel sistem we bai i stopim ol pipel husat i yusim sistem long gridi pasin bilong ol long inapim laik bilong ol yet. Dispela ol pasin bilong korapsen na abyus long human rait i mas stop,” tupela alaens i tok insait long wanpela midia stetmen.

Ol alaens bilong ol sios lida i lukim korapsen olsem wanpela bikpela ston i pasim ai bilong ol pipel long luksave long human rait. Em olsem rait bilong ol pipel long stap long patisipet long politik na ikonomi na long sosaiti na tu long kalsa.

“Korapsen i save bagarapim human rait. Sampela taim dispela bagarap i save kamap stret hariap long pes bilong ol pipel na sampela taim em i save hait na kamap ples klia long ol arapela hap. Hevi bilong korapsen i kamapim hevi long laip bilong ol pipel olgeta de insait long Papua Niugini olgeta.

“Sampela eksampel bilong human rait em; rait long gutpela sindaun, rait long patisipet long gavman, rait long edukesen, rait long wok, rait long gutpela helt, rait long graun na rait long amamas,” tupela alaens i tok.

Tupela alaens bilong sios egens korapsen na alaens bilong human rait i salensim tu ol pipel bilong Papua Niugini long bekim singaut bilong God long Jeremaia 1:10. Em i tok mi givim atoriti long yu tude antap long ol nesen na kingdom long kamautim, pulim kamdaun, rausim na brukim long givim spes long yu bildim na planim nupela.

Rosa Koian i raitim