WANPELA lidameri husat i save wok hat long daunim hevi bilong soseri long kantri i singaut long ol memba bilong palamen i mas stopim dispela politik pilai na sapotim Praim Minista long putim kantri long gutpela mak inap narapela ileksen long 2022.

 Ruth Kisam, Ekseketiv Dairekta bilong Tribal Foundation i tok dispela pasin ol lida i soim i olsem ol liklik pikinini.

 “Dispela em i no nupela pasin mipela i lukim. Em ol seim ol lida i mekim wankain pasin olsem bipo. Na ol pipel i tait pinis long lukim dispela pasin.

 “Kantri i no lukim gutpela senis insait long las 10 yia.

 “Namba bilong ol pikinini na mama indai i no senis. Namba bilong polisman na polismeri long was long hevi bilong lo na oda long kantri em i stap long 1:2000 (wanpela polis opisa long 2,000 manmeri). Dispela i soim klia tru wanem as na hevi bilong lo na oda em i antap tru long kantri,” Mis Kisam i tok.

 “Ol haus sik i nogat marasin na sapos marasin i stap ol i olpela pinis. Wankain tu long ol masin bilong sekim na stretim ol sikmanmeri na pikinini.

 “Ol rot i bruk na bagarap na ol bris i no moa stap. Ol skul tu i sot long ol samting, em i tok.

 Long ol taun na siti, Mis Kisam i tok ol wokmanmeri tu i pilim pen. Kost bilong wara, pawa na haus em i antap tru.

 Mis Kisam i tok em i lukim long Facebook planti tok pait i go i kam namel long ol memba bilong palamen na dispela i no soim rispek long wanpela na narapela.

 “Olgeta memba bilong palamen i makim ol pipel bilong ol na kain ol toktok long Facebook i no soim rispek long ol pipel we dispela ol lida i makim.

 “Ol memba bilong palamen i mas stopim dispela pasin bilong ol liklik pikinini na sanap na toktok olsem lida.

 “Dispela ol pasin i soim tru ol lida i no kea long ol pipel. Ol i tingim ol yet tasol,” Mis Kisam i tok.

 Em i singaut long olgeta lida i mas stop na bringim bek stabiliti long gavman.