OL pipel bilong ples Krum long Yuat lokal Level Gavman, Angoram Distrik, Is Sepik provins i singaut long gavman bilong Is Sepik na Nesenel gavman long lukim na harim krai bilong ol.

Wanpela lida man Sixtus, long ples Krum, husat i toktok wantaim tupela Nesing Helt opisa long Is Sepik Provinsel Helt i tok,"Mi amamas tru long kam bilong yupela long hia na helpim mipela long marasin samting."

Sixtus i tok olsem ol save dai long hap rot bikos haus sik long Yuat i longwe, na ol i stap klostu long boda wantaim Kompiam Ambum na Maramuni long Enga Provins na Is Sepik.

Em i tok, ol i save vot long ileksen tasol ol i no save kisim sevis bilong gavman."

“I gutpela long dispela ol Nesing opisa i kam long wokim polio klinik raun na tu toksave long sik coronavirus na ol arapela nupela sik bikos mipela no save na kisim dispela ol toktok.”

Sixtus i tok olsem las taim ol Is Sepik provinsel helt wokmanmeri i kam, em long 2012. I kam inap nau planti bilong ol i dai pinis long sik na bikpela sua.

Tupela nesing opisa, Silvia Kubera, na Sista Melinda bilong dispela polio tim husat i bin go long wik i go pinis long ples Krum i tok olsem planti manmeri, pikinini na yangpela i no save long ol nupela sik. Ol i nogat skul tu.

Ol i nidim ol kain sevis olsem haus sik na skul long ples bilong ol, Planti i no save long sik COVID-19 , na dispela Niu nomal na ol nupela pasin, we i ken helpim ol long abrusim dispela sik nogut.

Tupela helt opisa i askm gavman long lukluk long ol kain ples long kantri we i no kisim sevis bilong gavman.

Jonathan Poema i raitim