NESENEL Pandemik kontrola na Polis Komisina David Manning i singaut long ol pipel i mas stap was long COVID-19 long dispela taim we kantri i lukim namba bilong keis i go antap abrusim 600.

Manning i tok ol pipel i mas bihainim ol gutpela pasin bilong abrusim dispela sik nogut.

Em i tok lukaut olsem nau long dispela taim bilong krismas planti pipel bai i muv i go i kam. Ol sumatin tu bai i go bek long ol famili bilong ol long holide.

Dispela ol muv i go i kam i ken kamapim hevi bilong coronavirus insait long ol komyuniti.

Manning i tok, “Yumi go insait nau long krismas. Olgeta sitisen i mas bihainim ol oda bilong banisim COVID-19. No ken karim binatang bilong dispela sik i go long haus o ples. Wasim han olgeta taim na stap longwe long ol bikpela bung.

“Mi tok tu long ol helt kea wokmanmeri husat i lukautim ol sikmanmeri long lukautim helt bilong ol yet tu na bihainim gut tru ol pasin bilong banisim na abrusim sik long wok ples na long ol pablik ples.

“Nesenel Kontrol Senta bilong COVID-19 i kisim ol ripot i soim olsem long planti provins ol pipel i no putim pes mask na i raun long pablik ples. Dispela em i no gutpela pasin,” Manning i tok.

Namba bilong COVID-19 i wok long go antap yet. Wes Nu Briten i ripotim 13 nupela keis las wik na dispela i apim namba bilong keis long dispela provins i go antap long 64. Olgeta dispela 13 keis i kam long Talasea.

Namba bilong olgeta keis long PNG nau i stap long 684.