CATHOLIC Professional Society PNG (CPS PNG) wantaim Individual and Community Rights Advocacy Forum (ICRAF) i bin bung wantaim na mekim strongpela tok nogat long wesan maining we i laik kamap long Not Kos Madang.

Wesan maining i save kamap taim ol i digim wesan long nambis, solwara o wara. Ol i tok dispela wesan i gat ol gutpela indastriel element bilong mekim konkrit.

Long taim ol i bin holim midia konprens, tupela grup i bin toktok long ol hevi we bai kamap sapos dispela mainig i kamap. Ol i sanap wantaim MAKATA na ol pipel bilong Madang na tok nogat long dispela maining.

I no gat polisi na lo long wesan maining. Na tu ol pipel i no kisim gutpela save long dispela. I no gat gutpela awenes i bin kamap we ol pipel i ken harim na givim tingting bilong ol.

Presiden bilong CPS na ICRAF Paul Harricknen i askim Conservation na Environment Protection Authority (CEPA) long kam aut na tok klia long ol pipel long wanem as tingting bilong ol na ol i givim tok orait long maining i kamap long wankain eria we ol i bin makim pinis olsem konsevesen eria bilong ol trausel na narapela samting long solwara.

CPS i askim ol memba bilong Palamen tu long pinisim kwik ol politikel hevi bilong ol na lukluk long ol kain hevi we i wok long kamap bilong bagarapim kantri.

 Harricknen i tok planti taim ol turangu manmeri na pikinini wantaim envairomen i save kisim hevi  bikos long ol risos divelopmen projek we i save kamap.

 Wenseslaus Magun bilong MAKATA (Mas Kagin Tapana Inc) , husat i save wok long sevim ol trausel long dispela eria i no amamas tru long dispela wesan maining.

Narapela memba bilong CPS komiti James Wanjik bipo Sekretari bilong Main na Petroleum dipatmen i bin tokaut klia long proses bilong kisim maining laisens. Em i tok dispela proses i no kamap long dispela projek.

Asbisop bilong Madang Asdaiosis Anton Bal i bin stap tu long dispela bung na em i sapotim CPS PNG long dispela kempein.