ASKIM i go long ol manmeri long luksave long lokal Bogenvil akaunting kampani husat i laik givim sevis long ol manmeri.

Dispela kampani Kuna Taberia Kiruwi Akaunten & Edvaisa o KTK i stap long Buka.

Kampani i stat long 2016 na i wok long gro isi tasol i no olsem em bin ting bai kamap.

Papa bilong kampani, Kuna Kiruwi i tok i no gat planti ol akaunting kampani long Buka o long Bogenvil na olsem em i bikpela samting long ol i save na kisim sevis long em.

Sampela ol sevis kampani i save givim em teksesen, akaunting, bisnis edvaisori, wok pemit na visa, fainensel straksa na insolvensi na odit na asurens.

Mista Kiruwi i tok ol manmeri i no wok hat long go ausait long painim helpim bikos ol i stap bilong givim sevis long lokal komyuniti.

Long wankain taim, papa bilong Destiny Guest Haus long Buka, Jeffrey Magum i tok Atonomus Bogenvil Gavman i mas wok strong long daunim hevi bilong lo na oda long komyuniti.

Em i tok taim rijon i wok hat long lukim senis long wok politik, dispela i save kam wantaim ol salens na lo na oda i wanpela long ol bikpela salens ol bisnis bai bungim.

Em i mekim dispela tok long taim em i givim K50,000 sek mani long Bogenvil Futbol Federesen long pinis bilong las mun long lukim rijon i holim gut ol soka pilai.

Em i tok sapot i go long ol yangpela i mas wanpela namba wan wok bilong gavman.

Alex Munme i raitim