OL Nesenel Stetistikal Opis (NSO) i nau redi long wokim 2021 National Population and Housing Census (NPHC) long neks level.

Dispela bai kamap gut bihain long Nesenel Gavman i bin makim K70 milien i go insait long dispela 2021 Nesenel Badset i bin pasim long Novemba long Palamen.

Dispela K70 milien em hap badset bilong K168 milien we NSO i bin mekim na givim Gavman long fandim dispela 2021 Census.

Dairekta bilong Census Misis Hajily Kele i tok dispela fanding bai ol yusim long graun wok na redi long neks yia census wok.

Misis Kele i tok dispela wok em bilong census fil opisa long go aut long wan wan provins na kisim ol gutpela namba bilong populesen.

Em i tok NSO bai no inap wok em yet olsem na ol nidim patnasip, bung wantaim na koperesen bilong pablik na praivet sekta   wantaim long karim aut cenus.

“Mi bilip olsem dispela bung bilong mipela em bikpela samting bikos mipela nidim pipel long makim nek bilong census na Jenelis em kain pipel,” Kele i tok.

Ekting Nesenel Stetistisen Mista John Igitoi i tok dispela em bikpela samting long NPHC i mas sanap strong long graun na mekim wok long taim.

Em i tok ol midia em namba wan patna long givim rait infomesen bilong census long ol pablik.

“Midia em bikpela patna long kodaktim dispela operesen bilong dispela census,” em i tok.

Tupela Misis Kele na Mista Igitoi i bin mekim dispela toktok long wan-de NSO Woksop bung bilong ol long Gateway Hotel long Pot Mosbi.

Bikpela tingting bilong dispela Woksop em long empawarim ol Jenelis long andasten na ripot klia long NHPC we bai kamap neks yia.

Jacklyn Kimala i raitim