INAP long asde, wanpela meri tasol i nominet long resis long Bogenvil rijonal sia.

Dispela meri em Ilane Munau, wanpela jenolis (ripota) na muvi produsa.

Em i tok em i laik sanap long rait bilong ol meri na lukim ol meri na ol yangpela i gat gutpela sindaun.

Em bai salens wantaim ol meri na i bilip em inap long senisim tingting bilong manmeri long votim em.

Em i mekim dispela tok long taim em i nominet long resis long dispela wik.

Ilane i bung wantaim ol arapela lain manmeri na mekim ol muvi bilong ol hevi i pas long sut tok bilong soseri (sanguma), “sorcery related violence” na narapela long Ambai na Aliko.

Em i hop olsem ol manmeri bai gat gutpela tingting na makim meri long dispela taim.

Bogenvil sia i stap nating bihain long pastaim rijonal memba Joe Lera i lusim sia long resis long sia bilong Atonomus Bogenvil Gavman Presiden namel long dispela yia.

Long taim bilong sainim ol writ long Gavman Haus, Konedobu long las wik Fonde, ekting Ilektorel Komisina Simon Sinai i tok nominesen de bilong ol manmeri long nominet bai pas tude.

Poling o taim bilong vot bai stat long dispela Sarere. Em bai wanpela de bilong vot tasol.

Bihain long dispela kaunting bai stat.

PNGEC i plen long kisim ol writ i go bek long Gavman Haus long 10 Februeri.

Mista Sinai i tok komisin i bin askim long kisim K15 milien long kamapim dispela bai-ileksen tasol i kisim K8 milien tasol.

Em i tok inap long 200,000 manmeri bai vot long dispela ileksen.

Inap long  410 poling tim bai stap: 120 long Saut Bogenvil, Not Bogenvil (172) na Sentral (118).

Praimeri kaunt bai kamap long ol komyuniti asembli na ol elimenesen kaunt bai kamap long rijonal ilektorel opis long Buka.