NESENEL Maritaim Sefti Atoriti (NMSA) bai i wok bung wantaim polis long ranim operesen insait long taim bilong krismas na nu yia.

Dispela em long helpim long kontrolim namba bilong ol pasindia i kalap long ol sip long i go i kam.

Ol i kolim dispela operesen, ‘Operesen Ovalod’. Operesen Ovalod bai i stat long neks wik na bai i ran wantaim sapot bilong ol polis bilong solwara.

NMSA bai i salim ol atorais opisa bilong ol husat bai i karimaut dispela wok bilong ol bihainim ol lo bilong Merchant Shipping Act 1975. Ol bai i stap long ol sipot na ol arapela hap we ol sip i save kisim na lusim pasindia.

Sif ekseketiv opisa bilong NMSA Paul Unas i tok olsem wok bilong ol atorais opisa em long lukim olsem ol sip i bihainim seif pasin long karim pasindia long dispela taim. Ol dispela marin sefti opisa, o atorais opisa bai i inspektim na sekim sefti setifiket bilong ol sip na bai i lukluk na skelim hamas pasindia i kalap o lusim sip. Dispela em long helpim long skelim namba bilong pasindia i inapim mak bilong namba i stap long setifiket bilong sip.

Mista Unas i tok sapos ol i painim olsem ol sip i no bihainim lo ol bai i ripotim ol long menesemen bilong NMSA na ol i ken mekim disisen long wanem mekimsave ol bai i givim siping opereta. Sampela dispela mekimsave em olsem; ol i ken kalabusim sip, o ol i rausim o saspendim setifiket bilong kru o ol i ken kotim opereta.

Em i tok moa olsem aninit long Merchant Shipping Act NMSA i gat pawa long mekimsave long ol siping opereta sapos ol i no bihainim lo tasol ol i hop olsem ol operetta bai i bihainim ol lo long lukautim ol sip, kru na pasindia bilong ol.

“NMSA i laikim koperesen bilong ol siping kampani na ol pablik husat i trevol long dispela krismas na nu yia long mekim trevol long solwara i seif,” Mista Unas i tok.