BIHAIN long birua wantaim ol raskol long Tokua eapot, Kokopo las wiken ol sumatin long University of Natural Resource and Environment (UNRE)i stap wantaim bikpela prêt.

Ol i tok ol i painim hat long go bek long ol ples bilong ol na ol i singaut long polis long Mosbi long go helpim ol long go long eapot. Tasol i no gat nid long Mosbi polis i go. Asde Trinde moning ol polis long Tomaringa polis bareks i helpim na eskotim sampela sumatin i go long eapot na ol i go pinis long ples bilong ol.

Dispela em long wanem ol famili bilong ol tupela husat i dai long wiken i putim was long bekim dispela hevi wantaim ol sumatin sapos ol i go long eapot gen. Tasol ol sumatin i tok ol i no statim hevi.

Nau yet ol ripot i kam long Kokopo I tok ol polis i holim tupela raskal pinis na putim tupela long sel.

Long UNRE i gat singaut nau i kam long ol sumatin na ol wokmanmeri long ol hetman bilong yunivesiti long putim banis raunim yunivesiti long wanem ol i lukim ol lain i raun na pretim ol residen.

Ol komyuniti arere long yunivesiti tu i stap sambai long helpim yunivesiti lukluk long dispela hevi bilong ol raskol i laik kamapim hevi long UNRE.

Long dispela taim tu ol komyuniti long Kokopo i laikim ol lida i mas rausim ol setelmen.