MINISTA bilong Graun na Memba bilong Lae, John Rosso, i bin givim K60,000 sek mani long Lae polis long las wik.

Dispela sek em Lae Metropolitan Polis Komanda Sif Suprintenden Inspekta Chris Kunyanban i kisim long han bilong Rosso.

Dispela mani i bilong helpim polis long wok bilong ol long taim bilong Krismas na Nu Yia.

Long Mande, 7 Disemba, Islands Petroleum i stat long pulapim ol polis kar long helpim ol long mekim operesen i go long Krismas na Niu Yia 2021.

Rosso i givim dispela helpim long strongim wok bilong lo na oda.

Rosso long taim bilong givim sek i tok namba bilong ol bikpela hevi i pas long lo na oda i go daun 80 pesen stat long 2015.

Em i tok ol liklik hevi olsem stilman kisim bilum long bas stop na arere long ol stua i wok long kamap.

Tasol em i tok maski long dispela, polis i wok hat yet long daunim dispela ol hevi olsem olgeta pasin nogut i mas stap daunbilo o pinis.

“Dispela ol hevi bilong lo na oda i bin stap longtaim i kam inap nau na i no samting we i kamap nau tasol,” Rosso i tok.

“Olsem nae m I no Lae Siti Atoriti (LCA), polis o ol lida tasol bai daunim hevi bilong lo na oda.

“Em i wok bilong yumi olgeta, long yumi stap seif na fri long kain kain hevi.”

Sif Inspekta Kunyanban i tok tenkyu long memba na i tok bikos long kain sapot, polis inap long karimaut gut wok bilong em.

Rosso i yusim distrik sevis impruvmen program (DSIP) mani na i baim ol kar bilong Lae Siti Polis, Omil polis stesin, Eriku Futbol Yunit na 30 sita bas bilong CS Buimo kalabus.

Em i yusim tu DSIP mani long baim ol kar bilong Lae Mobail Skwat 13, CS Buimo na ol arapela eria bilong lo na oda sekta tu.

Willie Brul i raitim