OL OPISA bilong gavman i mas mekim wok stret bihainim pe bilong ol, wanpela sinia opisa
i tok.

Ekting Sif Seketeri bilong Atonomus Bogenvil Gavman (ABG), Shadrach Himata i mekim
dispela tok long taim ol pablik seven i sainim kontrak wantaim gavman long pinis bilong las
mun.
Inap long 56 opisa i sainim kontrak bilong ol long Buka. Ol opisa olsem hetman bilong ol
dipatmen, ol dairekta, ekseketiv dairekta na menesa bilong ol dipatmen.
Presiden bilong Atonomus Bogenvil Gavman, Ishmael Toroama, Minista bilong Pablik Sevis,
Melvin Wilolopa na ol arapela Minista i bin stap tu long dispela saining seremoni.
Toroama i amamas long ol pablik seven i saining kontrak tasol i salensim ol na i tok dispela i
wanpela salensim taim bilong rijon na olsem ol i mas mekim wok stret na i no paul na lusim
taim.
“Dispela ol kontrak yupela i sainim i soim olsem yupela i laik givim gut sevis long ol pipel
bilong Bogenvil,” Toroama i tok.
“Yupela i mas mekim wok wantaim olgeta bel na tingting.”
Toroama i tok rijon nau i redi long go insait long nupela sistem na ol pipel i mas sanap strong
na redi long wok.
Em i tok ol i bin vot na tokaut long tingting bilong ol olsem ol inap sanap na ol i mas soim tru
dispela tingting na toktok long wok bilong ol.
“Wok i no inap kamap inap yu yet kirap na mekim.
“Yu gat laik na save na yu mas karimaut dispela long wok bilong yu.”

Alex Munme i raitim