GAVMAN na Oposisen wantaim i tok ol i gat namba long kamapim gavman long taim
palamen bung gen.

Dispela bung bai kamap bihain long disisen bilong kot.
Long nau yet em i no klia wanem grup i tok tru. Moa yet, em i no stret long kolim wanpela
namba bikos ol memba i wok long kalap i go kam namel long tupela grup.
Dispela i tru bikos Memba bilong Kagua Erave long Sauten Hailans, inap long Sande i bin
stap long Oposisen kem na long Sande em i bin lusim Vanimo, Wes Sepik wantaim grup na
ol i kam long Pot Mosbi.
Long Mande em i kalap i go long Gavman na long Tunde em i kisim wok olsem Minista i
helpim Praim Minista na Minista bilong Spots.
Bihainim dispela makim, Gavman i tok moa ol memba i tok long lusim Oposisen na i go
joinim em.
Tasol Oposisen grup long Tunde apinun bung long Crowne Hotel i tok ol i gat 53 memba.
Tasol ripot i tok taim ol i kaunim wan wan ol memba ol i kamap wantaim 49 memba tasol.
Praim Minista James Marape i tok gavman i gat 54 long grup bilong em.
Inap long asde bipo long dispela pepa i go long prin, em i ken tok olsem Gavman i gat 54
memba na Oposisen i gat 49 memba.
Long wanpela grup i ken kamapim gavman, namba bilong ol memba long sait bilong em i
mas abrusim namel mak 56 (absolute majority).
Gavman grup kem i stap long Loloata Ailan Risot, ausait long Pot Mosbi na Oposisen i stap
long Crowne Hotel.
Sampela ol memba husat i lusim kem bilong Oposisen na i bin stap tu long palamen kibung
long 17 Novemba na vot long kamap bilong 2021 Baset em Yunaitet Risos Pati lida, William
Duma.
Duma i tok em i bin kirap nogut na i no save long sait em bai go long em taim sampela
memba bilong gavman i lusim gavman na i go long Oposisen long 13 Novemba palamen
kibung.
Tasol em i amamas long go bek long gavman na i sapotim gavman.
Bihain long dispela Memba bilong Wewak husat i memba bilong ruling Pangu Pati i lusim
gavman na i go joinim Oposisen.
Long las wik tasol Minista bilong Haus, Justin Tkatchenko i lusim Oposisen na i go bek long
Gavman.
Em i tok em i laik stap wantaim Sosel Demokratik pati lida bilong em na Gavana bilong
Nesenel Kapital Distrik, Powes Parkop.
Parkop long dispela wik i tok em i no sapotim wanpela sait tasol em i stap long namel na i
askim tupela grup long kamapim wanpela gren kolisen gavman.
Em i tok dispela i taim nogut bilong sik coronavirus (COVID-19) na hevi bilong ikonomi na
olsem pilai politik tumas i no gutpela long stap bilong kantri.