GAVMAN na Oposisen wantaim i amamas long disisen bilong Suprim Kot long Mande long
surukim de bilong palamen kibung bilong 1 Desemba, 2020 i go long narapela de.

Kot i no makim yet dispela de tasol bai mekim disisen bihainim kain mak kot namel long
Memba bilong Ialibu-Pangia, Peter O’Neill na Spika Job Pomat i kamap long em.
Tasol kot i givim luksave yet long tupela de em 1 Desemba, 2020 na 20 Epril, 2021 em ol de
palamen kibung yet i bin makim.
Dispela kot i lukim faivpela man jas we i pulapim olgeta sia bilong ol jas.
Ol jas em Sif Jastis Gibbs Salika, Jastis David Cannings, Derek Hartshorn, Jastis George
Manuhu na Jastis Ere Kariko.
Kot tru bilong O’Neill na Pomat bai kamap long Suprim Kot long Waigani long tude.
Disisen bilong holim na surukim de bilong palamen kibung long 1 Desemba, 2020 kibung i
go long narapela de i kamap bihain long Kot i kisim tok orait long ol loya bilong tripela pati
em Greg Sheppard husat i makim O’Neill, Charles Mende husat i makim Pomat na Nemo
Yalo husat i makim Atoni Jeneral, Pila Niningi.
Bihain na ausait long kot haus Kerenga Kua husat i makim gavman i tok disisen bilong kot
long surikim de bilong kibung i givim ol bel isi.
Em i tok dispela em bikos ol bai nau lukluk tasol long kot namel long O’Neill na Pomat.
Oposisen lida Belden Namah i tok dispela disisen i gutpela na i orait.
“Dispela nau bai lukim ol loya bilong mipela i wok,” em i tok.
“Mi amamas long dispela disisen.”

Paul Zuvani i raitim