LAS wik ol sios na sivil sosaiti i singaut strong long ol memba bilong palamen long stopim pasin bilong
bruk bruk na i mas kamapim bel isi namel long ol yet na long kantri.

Long Fonde PNG Council of Churches (PNGCC) i singaut na tok ol memba i mas stap isi na tingting long
gutpela bilong ol pipel.
Long makim PNGCC Kadinel Sir John Ribat i toktok strong long ol lida i mas no ken tingim ol yet.
“Nau em i no taim bilong dispela kain pasin. Yumi gat bikpela hevi bilong coronavirus i stap.
“Ol investa i lukluk long yumi na dispela i no soim gutpela piksa tru,” Kadinel Ribat i tok.
Em i tok moa olsem mama lo em i antap na olgeta memba i gat wok long no ken daunim em.
Rev Roger Joseph, Jeneral Sekreteri bilong PNGCC i askim, “Wanem kain mak o piksa yumi ol lida i laik
lusim bilong ol pikinini i ken lukim bihain?”
Long Fraide ol sivil sosaiti i sapotim ol sios na tokaut olsem, “Mipela ol pipel i no inap pasim maus moa.
Mipela i singaut long ol sanap strong na strongim kantri, gutpela tingting, kontrol na rispek long lo.
Mipela i joinim ol lida bilong sios wantaim spirit bilong bel isi i singaut long ol memba bilong mipela long
kamapim bel isi na no ken kirapim hevi namel long ol pipel.
Ol i tok olsem dispela kantri i pilim hevi bilong COVID-19 na ikonomi we i lukim planti pipel i raus long
wok pinis, ol bisnis i pas, edukesen na helt i pilim hevi na hevi bilong lo na oda i go antap. Ol liklik
manmeri i pilim bikpela pen bilong dispela taim nogut. Sindaun bilong ol famili i bagarap na vailens
namel long ol man na meri i no helpim long kamapim gutpela sindaun bilong ol pipel.
Olsem na mipela i singaut strong long tupela politikel kemp wantaim long tingim ol pipel pastaim.

Rosa Koian i raitim