PAPUA Niugini Sivil na Aidentiti Rejistri (PNGCIR) i no bai givim praoriti moa lo NID
rejistresen bilong ol pablik seven husat i stap insait lo Nesenel Kapitol Distrik long 30
Novemba 2020 i go.

Dispela de i kam na go pinis.
Ekting Rejistra-Jenerel Noel Mobiha i tok opis i bin makim ol pablik seven lolng Nesenel
Kapital Distrik olsem namba wan long mekim aidentiti tasol sapos ol i no laik kisim dispela
sans orait, ol bai stap bihain tru.
Em i tok insait long las tripela mun (Septemba i go long Novemba 2020) PNGCIR i wok long
op stat long 9 klok moning i go long 5 klok apinun long olgeta de bilong wok.
“Dispela em wanpela polisi darektiv long daunim kos bilong pablik sevis tru long rausim ol
giaman nem stap long gavman peirol,’’ Mobiha i tok.
Dipatmen bilong Pesenel Menesmen i wok klostu wantaim PNGCIR long luksave na tokaut
long hamas pablik seven i stap long Alesco/Ascender perol sistem.
Em i tok dispela long helpim long kamapim NID data bes long karimaut dispela wan posisen,
wan pesen, wan pipel isi bilong gavman.
Olsem 6-pela ol bikpela institusen bilong gavman husat i gat planti namba bilong pablik
seven wok em 98 pesen aninit long ol em:
 Provinsal edministresen 7,983;
 Ol dipatmen na ol arapela Stet ejensi insait long NCD 10, 723;
 Viles kot na len mediesen 11, 009;
 Disiplineri fos (polis, ami, koreksinel sevis) 12, 352;
 Helt Dipatmen, ol helt senta, aid post bilong PHA 13, 776; na
 Ol tisa na Edukesen Dipatmen hetkwata 65, 325.
Bungim wantaim em namba bilong pablik seven i long kantri i sanap olsem 121,168.

Mobiha i tok moa olsem PNGCIR nau bai givim bikpela luksave long rejisterim NID bilong
ol pablik seven i stap ausait long ol narapela provins.
Em i tok ol mobail rejistresen opisa bilong PNGCIR i stap long olgeta hap bilong kantri na o i
wok bung wantaim Dipatmen ov Pesenel Menejmen (DPM) lo rjisterim ol pablik seven insait
long ol provins.
Ol het bilong ol dipatmen na sif eksekutiv opisa ol nesenel pablik sevis opisa i mas karimaut
dispela gavman dairektiv na wok bung wantaim DPM na PNGCIR long rejista na kisim NID
kad bilong ol pablik seven bipo long 31 Jenueri, 2021.
Pinis...