LONG pinisim olgeta kainkain vailens namel long famili na komyuniti, ol pikinini man i mas
kisim gutpela skul long ol mama na papa bilong ol.

Sif Ekseketiv Opisa bilong Nesenel
Geming Kontrol Bod (NGCB) Imelda Agon i mekim dispela tok namel long bung bilong ol
meri long Mande.
“Wok em i stap long yumi ol mama long skulim ol piknini man bilong yumi gut. Yumi mas
skulim ol pikinini man olsem, meri we ol i tingting long maritim bihain bai no inap long sanap
long ples bilong kukim kaikai tasol, ol i mas luksave olsem ol meri i wankain olsem ol na ol i
gat wokmak long mekim long sosaiti tu,” CEO bilong NGCB Agon i tok.
Em i tok taim ol pikinini man i luksave olsem ol pikinini meri i wankain olsem ol, dispela i bai
daunim vailens insait long famili na komyuniti bihain taim, taim ol i kamap papa o het bilong
famili. Ol i bai rispektim ol meri, sapotim ol na wokbung wantaim ol.
Imelda Agon i tok taim em i kamap CEO bilong NGCB, em i apim profit bilong NGCB long ziro
i go antap long K30 milien long wan wan mun. Em i tok aninit long lidasip bilong em NGCB i
sanapim planti skul na haus sik long kantri.
“Mi tok tenk yu tu long ol man husat i stap long bod bipo na nau long bilip long meri. Ol i
bilip olsem meri i ken mekim na meri i kamapim planti samting,” CEO Agon i tok.
Dipatmen bilong Komyuniti Divelopmen na Rilijen aninit long Stet-Sios Patnasip i holim
wanpela bung bilong ol meri aninit long dispela het tok “Ol meri bilong bildim Nesen – Ol
meri save kamapim senis”
Dispela bung i bin lukluk long pinisim olgeta kainkain vailens insait long famili na komyuniti
na wanem ol mama na pikinini meri i ken mekim long pinisim vailens.
Rebecca Negere i raitim