MASKI long hevi bilong coronavirus (COVID-19), ikonmi bilong Papua Niugini bai ran gut long 2021, Minista bilong Treseri Ian Ling-Stuckey i tok.

Em i tok gros domestik prodak (GDP) bai stap long 10.9 pesen.

Gavman bai yusim tripela hap long strongim ikonomi.

Em i tok namel mak (average) alokesen bilong mani long wan wan manmeri em K1000.

Em i tok dispela em bikpela mak ol manmeri bilong kantri i bai gat long em long histori bilong kantri.

Dispela i min olsem manmeri inap long baim isi rais na tin pis na ol sevis olsem transport, wara, pawa na telekomyunikesen maski prais i bikpela.

Em i mekim dispela tok long taim em i tokaut long K19.6 bilien 2021 Defisit Baset long Palamen las wik.

Dispela baset i bikpela baset long histori bilong kantri tasol i namba 9 “straight” Defisit Baset bilong kantri.

PNG i wok long kamapim ol defisit baset stat long taim O’Neill i bin kisim gavman i kam inap nau long taim bilong Marape.

Bihain long em i tok orait long baset, palamen i surukim kibung i go long 20 Epril, 2021.

Mista Ling-Stuckey i tok gavman i lukluk long tripela hap long strongim ikonomi.

Namba wan em long wok bilong egrikalsa, diwai (forestri), fiseri na liklik i go long namel sais bisnis (SME).

Namba tu em long salim ol manmeri i go wok long ol fam long Australia na Nu Silan na bringim mani na save i kam insait long kantri.

Namba tri em long opim gen Porgera Gol main na opim ol nupela projek olsem Papua LNG na Wafi-Golpu Main.

Paul Barker bilong Institut bilong Nesenel Afeas i tok em i gutpela long gavman i tokaut long ol plen bilong em tasol em i mas karimaut tru dispela ol plen olsem sindaun bilong manmeri i gutpela na kantri i ran gut.