Wanpela klen insait long pogera gol main laisins eria i laikim nesenel gavman long putim ol go insait long nupela benefit dil pastaim long maining i ken op gen.

Siaman bilong Paiken Lenonas Asosiesen Inc. Bilong Pogera Veli Thomas Petale i mekim dispela toktok long Pot Mosbi olsen Paiken Klen i bin misaut long ol royalti na sampela ol benefit bilong Pogera main inap 30 krismas. Petale i tok Paiken klen i stap insait long Lmp 72, Lmp 03, Lmp 103 na maining i save yusim olsem ples bilong tromoi pipia.

Em i tok bikos long sampela paul pasin i bin kamap, Paiken Klen i no bin sainim MoA long Me 1989 namel long gavman na Pogera Lenonas long divelopim Pogera gol main.

“Mipela i bin misaut long taim bilong saining long Me 1989, olsem na mipela Paiken Klen bilong Pogera i askim gavman long putim mipela i go insait long dispela nupela MoA bikos olgeta stok pail nau i stap long graun bilong mipela na nogat man inap rausim mipela long hap,” Petale i tok.

Petale i tok ekspaia bilong Pogera main SML laisins i kamap pinis na dispela rinual em i sans bilong Paiken Klen long sainim dispela nupela MoA wantaim nesenel gavman na maining.

“Ples we pipia i stap long em, em Anawe Not Lmp 72 na em i kisim bikpela  eria long graun bilong mipela.

“Olsem na nau, Paiken Lenonas Asosiesen olsem rejista bodi i askim nesenel gavman long luksave na helpim mipela patisipeit na benefit long operesen bilong Pogera main olsem ol papagraun,” Ol Pogera lenona i tok.

 Joseph Dawai i raitim