GAVANA bilong Is Nu Briten, Nakikus Konga i tok provins i mas painim na kamapim mani long strongim em yet.

Em i tok provins i no inap sindaun tasol na wetim mani long go long ol.

Konga i mekim dispela tok long taim provins bilong em nau i stap olsem wanpela atonomi gavman.

Tupela arapela provins we i ksim atonomi arere long Is Nu Briten em Nu Ailan na Enga Provins.

Dispela atonomi gavman em ikonomik indipendens we i tok ol provins bai kamapim mani long strongim ol yet.

Dispela atonomi i narapela long atonomi Bogenvil i kisim. Bogenvil atonomi i politikal atonomi we Bogenvil i laik bruk lusim Papua Niugini na stap bilong em yet.

Long dispela tripela provins, em i ikonomik atonomi.

Ikonomik atonomi i min ol provins bai kamapim mani bilong ol yet long menesim ikonomi bilong ol.

Gavman i save givim ikonomik atonomi long ol provins bihainim luksave long ol rot ol provins i gat strong long kamapim mani na wei ol inap menesim risos bilong ol.

Sapos ol provins i no inap menesim ol yet, gavman i no inap givim ikonomik atonomi. Ol bai stap aninit yet long nesenel gavman.

Bikos long gutpela menesmen, Gavana Konga i kisim wanpela tim we ol i go long Saina long dispela mun na kisim K1.4 milien long karimaut ol wok long provins.

Dispela mani i helpim (asisten) mani em provins i kisim aninit long Asia Pasifik Turisim ogenisesen long stretim ol rot we i go long ol turis ples insait long provins.

Em i amamas olsem provins i kisim dispela mani bikos provins long las 20 yia i no bin kisim wanpela gutpela mani long nesenel gavman.

Em i tok wantaim K1.4 milien gavman bilong em bai stretim tu ol rot long not kos i go long Rabaul.

“Yumi gat planti projek long mekim tasol hevi i stap long mani,” Konga i tok.

“Yumi mas kamapim ol wok olsem mipela i stap strong.

“Yumi no ken sindaun wetim mani long kam.”

Konga i tok provins i lukluk long mani mak bilong K3 bilien long kirapim wok divelopmen long provins.

Em i tok ol i nidim K28 milien long stretim na pinisim gut Tokua Ples Balus na K300 milien long wokim pis keneri long Tavilo.

Em i tok ol i kisim tu K5 milien long Wol Benk long kamapim ol kopi fam na strongim ol kopi fama.

Em i tok K135 milien long wokim nupela taunsip long Kuridal long Lasul Baining LLG.

Em i tok bisnis han bilong Is Nu Briten provinsal Gavman bai givim K1 milien long 2021 long kirapim wok bilong ol sios i go het insait long provins.

Konga i amamas tu long ol sios long mekim bikpela wok long provins.

“Mipela i laik kisim sevis i go long ol pipel long lukim ol i gat gutpela sindaun na dispela i mas bihainim plen bilong Papa God.”

Michael Novingu i raitim