Tude Oposisen i bringim tupela kot egensim gavman na Spika bilong Palamen

KOT bilong save sapos askim bilong Spika Job Pomat long singautim palamen kibung long las wik Tunde i stret o nogat em i stap bipo long kot nau.

Tude ol loya bilong tupela pati bilong Gavman na Oposisen bai tokaut long taim ol bai askim kot long surukim taim bilong Palamen kibung long 1 Disemba bai go het nau o nogat.

Inap long 8-pela loya i kamap long kot, 6-pela i makim gavman na 2-pela i makim Oposisen.

Sampela ol loya em Loani Henao i makim Praim Minista James Marape na Klab bilong Palamen Kala Aufa, Nemo Yalo, Peter Kuman na Charles Mende i makim Spika Job Pomat, Greg Sheperd i makim Peter O’Neill (Oposisen) na Paul Paraka i makim ol sitisen bilong kantri.

Sif Jastis Sir Gibb Salika, husat i wanpela jas i sindaun long harim kot long Suprim Kot long Waigani asde i tok kain stap bilong ol toktok bipo long kot i hatpela.

Em i askim ol loya long kamap wantaim wanpela taim we kot i gat taim long skelim wanpela pastaim bipo long em i ken go long narapela kot.

Em i tok dispela i ken helpim ol kot long ol i gat inap taim long glasim na skelim ol toktok gut bipo long ol i mekim disisen.

Mista Henao i askim kot olsem i gat narapela kot keis i stap bipo long kot em Oposisen lida Belden Namah i mekim egensim eleksen bilong James Marape olsem praim minista.

Em i tok dispela ol toktok i stap bipo long kot na disisen bilong dispela kot bai mekim ol kot i save sapos kamap bilong dispela kot nau i orait long go het.

Em i tok dispela em kot bai save sapos dispela kot bilong palamen i sindaun long las wik Tunde na pasim 2021 baset i stret o no gat.

Tasol Greg Shepherd bilong William na Young Lo kampani i makim Oposisen i tok i gat inap taim long kot i mekim disisen na i no stret sapos kot i mas surukim dispela kot i go long narapela taim.

Sir Salika i bekim na tok em i save long dispela tasol i tok taim na kamap bilong ol gutpela disisen bilong kot i bikpela samting.

Em i askim ol loya bilong tupela grup long ol i mas sindaun na makim taim we i gutpela long long dispela kot i mas go het.

Dispela moning kot bai save long taim sapos kot egensim Spika Job Pomat bai go het.

Dispela kot bai mas kamap bihain long taim kot i mekim disisen bilong kot bilong Namah egensim ileksen bilong James Marape olsem praim minista.

Inap long tude i gat tupela kot em Oposisen i bringim egensim gavman na Spika bilong Palamen.

Sir Salika i tok kain ol kot i mas kamap sapos ol lida i tingting gut na bihainim ol lo na mekim ol disisen.

“Taim ol lida i mekim asua ol bai kam long kot long stretim hevi bilong ol,” em i tok.

“Bikos long asua bilong ol, manmeri i kisim taim nogut,” em i tok.

Tupela de narapela, narapela de bilong kibung em palamen i bin kaim, wanpela em long taim Oposisen i bin stap tu na i bin makim 1 Disemba, 2020 olsem de bilong narapela palamen kibung i mas kamap na narapela em long 20 Epril, 2021 we gavman tasol i bin stap na pasim tu 2020 K19.6 bilien long palamen i mas kamap.

Kain rot bilong kamapim ol mosen na singautim ol kibung i brukim ol lo bilong Palamen Stending Oda bilong Kibung bilong Palamen olsem na ol i mas go long kot long stretim.