OPOSISEN tim long Vanimo i singaut long gavman long rispektim ol institusen.

Ol i mekim dispela tok bihain long las wik Tunde wanpela wokman long opis bilong Praim Minista James Marape i bin singaut na traim long rausim tupela jenelis long palamen taim palamen i bin bung gen.

Oposisen lida Belden Namah na tim bilong em long Vanimo i tok dispela pasin em i pasin bilong dispela gavman long pasim maus bilong ol institusen bilong demokresi.

“Em i no mistek taim palamen i no bihainim lo na i kam bung gen, na ol memba bilong gavman tim i raun na i traim long rausim ol jenelis long Palamen haus,” Oposisen tim long Vanimo i mekim dispela tok insait long wanpela stetmen.

“Em i klia tru taim wokman i singaut na tok “Palamen em i haus bilong gavman,” ol i tok.

“Dispela tingting em i rong.

“Palamen i no haus bilong gavman. Em i haus bilong ol pipel bilong Papua Niugini. Em i haus bilong mekim lo.

“Fri nius na fridom bilong midia em i konaston bilong dispela demokresi na palamen em i piksa bilong dispela demokresi,” Oposisen i tok.

Ol i tok moa olsem dispela gavman i no luksave o rispektim ol prinsipel bilong tripela han bilong gavman. Em i no luksave tu olsem palamen em i tambu haus na wanem wok em i stap long mekim.

Spika i pasim het wantaim ol arapela na i daunim wok bilong namba tri han bilong gavman – judiseri, na mekim wok bilong jas em yet. Em i abrusim wok bilong em olsem spika.

“Dispela gavman i no kea em i surukim baset na spika i larim tasol gavman i pasim Nesenel baset tasol moa long hap bilong Papua Niugini i no bin stap long plua bilong palamen,” Oposisen i tok.