NEKS wik i go olsem, Papua Niugini bai bungim bikpela taim nogut olsem kantri, Polis Komisina na Pandemik Kontrola David Manning i tok.

Em i tok, dispela yia i pulap long hevi, na taim arere bilong dispela yia i wok long kam klostu ol hevi we i stap long kot na ol risal bilong disisen bilong kot bai soim bihaintaim bilong kantri bai stap olsem wanem.

Long Fraide, Novemba 13, sampela ol minista bilong gavman na ol memba i bin muv i go long sait bilong oposisen. Ripot i tokaut olsem ol i bin surikim palamen kibung i go long Disemba 1, 2020 na ol i bin i go long kemp o bung long Vanimo, Wes Sepik Provins.

Tasol bihain, Palamen i bin go het na Gavman bilong Marape i givim tok orait long 2021 Nesenel Baset.

“Olgeta dispela i stap long kot bilong skelim. Maski kainkain toktok i kamap long tupela sait wantaim, oposisen na gavman, olsem mi tok pinis em ol samting bilong kot long skelim.

“Long dispela taim i kam olsem, mipela i bin harim na lukim planti kainkain toktok long midia na intanet.

“Mi olsem Komisina bilong Polis i tingting planti long ol lo na oda hevi we i ken kamap long kantri bikos long pasin bilong ol minista na gavman. Mi tingting planti tu long ol eksen bilong ol lain husat i save painim sans raun. Taim ol i harim olsem sampela samting i no orait ol i ken mekim sampela samting long bagarapim gutpela oda na sefti bilong pablik,” Komisina Manning i tok.

Long wokmak bilong Komisina Manning na Royal Papua Niugini Konstabulari, ol i luksave olsem hevi em i stap pinis long han bilong kot. Olgeta sinia menesmen wokmanmeri bilong RPNGC i bung wantaim Komisina Manning na wanbel olsem dispela em i hevi bilong politiks na ol i mas stretim long dispela sait wantaim helpim bilong kot.

“Ol memba bilong Polis bai no inap long sapotim wanpela sait, ol i bai stap long namel tasol. Mipela i mas givim rispek long proses bilong kot na larim kot i ken skelim na ol lida long politik i ken mekim disisen

“Tupela pati, ol pipel bilong Papua Niugini na ol 111 memba bilong palamen i mas givim rispek long wanem disisen i kamap ,” Mista Manning i tok.

Rebecca Negere i raitim