LONG kisim was o lukaut, Komisina bilong Polis David Manning i bringim sampela ol polisman long ol arapela provins i kam long Pot Mosbi, husat bai givim sekyuriti long Nesenel Palamen na Nesenel na Suprim Kot namel long dispela taim bilong senis.

Komisina Manning i mekim olsem long stopim ol lain husat i wok long painim sans bilong bagarapim kantri.

“Mi toktok pinis wantaim Spika bilong Palamen Job Pomat. Na mi toktok pinis tu wantaim Sif Jastis bilong Papua Niugini Sir Gibbs Salika. Tupela wantaim i save pinis olsem ol polis bai stap raun long dispela ol hap long strongim ol.

“Aninit long lukaut bilong mi, dispela tupela han bilong gavman, Nesenel Palamen na Nesenel na Suprim Kot, bai i stap fri na i no gat wanpela samting bai stiam ol long mekim disisen,” Komisina Manning i tok.

Em i tok Divisenal Komanda NCD/Central Asisten Komisina Anthony Wagambie Junior na ol tim bilong en bai karim aut sekyuriti operesen long wik i kam olsem long lukautim ol sevis bilong gavman, na trenspot bilong bisnis na pablik.

“Mi askim ol pipel long sanap wantaim ol polis fos long dispela taim na larim gutpela tingting, jastis na lo i lukautim yumi olgeta,” Komisina Manning i tok.

Rebecca Negere i raitim