I GAT bikpela nid long strongim na karimaut ol lo bilong imigresen na ol wok pemit o tok orait long wok na gavman i mas givim sapot long dispela.

Wanpela sinia imigresen opisa Mista John Bria i mekim dispela tok long Simbu provins i no long taim i go pinis taim ol i arestim 15 manmeri long narapela kantri husat i stap long Hailans rijon. Em i luksave na arestim ol taim em i mekim 4-pela wik inspeksen bilong entri na wok pemit long hailans rijon.

Ol dispela 15 manmeri em ol lain long Asia rijon na Imigresen na Leba Dipatmen wantaim helpim bilong Nesenel Fraud Skuad i holim ol. Ol dispela inspeksen i bin kamap long Maunt Hagen, Jiwaka, Kundiawa, Goroka, Kainantu na Yonki.

Mista Bria i tok ol i arestim na sasim ol long brukim lo bilong imigresen na wok pemit regulesen. Nainpela em ol arestim ol long Maunt Hagen na Jiwaka, 4-pela long Kundiawa na 4-pela long Isten Hailans.

Em i tok Imigresen bai mekim sampela moa eksen long level bilong edministresen long ol lain brukim lo na ol tim bilong en bai go antap long hailans long harim kot bilong ol dispela 15.

“Mipela i karimaut ol lo long ol forina na ol investa i mas bihainim na stap aninit. Mipela i stap long apim ol investa long kantri na tu strongim na karimaut ol lo bilong kantri na ol investa i mas bihainim taim ol i stap insait long kantri,” Mista Bria i tok.

Em i tok ol wok inspeksen we i kamap long kantri i kamap long bihainim tingting bilong Minista na opis bilong Sif Maigresen Opisa.

Mista Bria is tap wantaim Imigresen moa long 13 krismas nae m i tok, long karimaut lo insait long kantri em i bikpela salens na em i nidim sapot bilong ol atoriti long nesenel na provins na ol arapela ejensi long kamapim gutpela envaironmen bilong ol forin investa.

Wright Media i raitim