OL 16 yangpela man i tok sori long komyuniti na God na i senisim pasin bilong ol.

Dispela ol yangpela man i mekim olsem insait long wanpela bikpela lotu i kamap long Balob Tisa Koles, Lae, Morobe Provins long las wik.

Dispela ol yangpela i save stap long Wes Taraka long Lae.

Ol it ok tenkyu long komyuniti na God long kisim ol bek.

Pasto Pasto Martin Moen bilong Wes Taraka i bin go pas long lotu.

Albet Sineki i lida bilong ol yangpela we em i go pas long lukim olgeta arapela i bihainim na senisim pasin.

ELCPNG Yabem Distrik Presiden Reveren Yasam Aiwara i tok olgeta lida bilong Morobe Provins i no bin stap long dispela bung long kisim ol yangpela.

Em i tok askim i bin go long Morobe Gavana Ginson Saonu, Lae Metropoliten Polis Komanda, Asisten Polis Komisina, Momase Rijen Peter Guinnes, CIS Komanda, ol pastaim Gavana bilong Morobe, na Memba bilong Lae John Rosso i no bin kamap na long lukim ol yangpela.

Long nem bilong ELC bilong Papua Niugini, Reveren Yasam Aiwara, presiden bilong ELC-PNG Yabem distrik wantaim Nesenel Ivanjelikal Seketeri, Reveren Elymas Bakung, tupela tasol i bin stap long bungim na kisim dispela yangpela man.

Wantaim tupela ol komyuniti memba, papamama na ol pikinini i bung long welkamim ol yangpela.

Ol yangpela i tok em i taim ol i kamap long wanpela mak bilong laip long luksave na lusim olgeta pasin nogut na kam bek.

Long ai bilong bung, ol i ritim tok sori bilong ol long ol manmeri na pikinini.

Ol i bihainim tok sori Sios i raitim we ol i tok sori long God, sios, gavman na komyuniti wantaim.

Long nem bilong sios, Reveren Yasam Aiwara wantaim Reveren Elymas Bakung i givim Baibel tok wantaim ol buk bilong wok long han bilong ol yangpela long ol i ken statim nupela laip bilong ol.

Reveren Bakung i autim Tok bilong God long Luk 15:1-31 i soim pasin bilong tanim bel na lusim pasin nogut.

Tok piksa bilong Jisas long wanpela pikinini i lusim papa bilong en na i go long longwe ples na bihain long olgeta mani samting i pinis, em i hangre na tingim papa na go bek long em.

Dispela stori i soim kain pasin ol 16 yangpela man i mekim.

Ol komyuniti insait long Wes Taraka na Lae siti i ken amamas long wanem God i kisim bek dispela ol man.

Sanang Zazoring i raitim