ASISTEN Komisina Polis (ACP) Noten Komand, Peter Guinnes i amamas long ol man husat i givim ol yet long han bilong polis long Trans-Gogol eria long Madang distrik long taim bilong spesel polis operesen na lo na oda awenes insait long eria bilong ol.

ACP Guinnes i tok ripot em i kisim long Madang Provinsal Polis Komanda (PPC), Mazuc Rubiang i soim olsem hevi bilong lo na oda long Trans-Gogol na Saut Ambenob we pastaim planti pipel i bin dai long pasin nogut bilong kalt na kilim indai man i stop nau. Moa long en tu, planti bikhet man i sarenda o givim ol yet i go long han bilong polis na i rausim ol samting nogut olsem hom-meid gan na ol ges silinda o kontena bilong wokim hombru o ‘yawa’

Em i tok tenkyu long Memba bilong Madang na Polis Minista, Bryan Kramer husat i go pas long kamapim bikpela senis wantaim ol lo na oda awenes komiti bilong em long distrik. Dispela spesel polis operesen MP Kramer i kamapim wantaim polis bilong autsait em ol i kolim ‘Kisim Bek Naispela Madang’

Kramer i bringim spesel polis yunit bilong McGregor long Mosbi i go mekim namba wan operesen stat long mun Me na bihain em i bringim ol lain bilong Noten Mobail Grup (NMG) long helpim insait long namba tu hap bilong spesel polis operesen long Madang distrik

ACP Guinnes i tokaut olsem dispela spesel polis operesen i karim kaikai na planti ol bikhet lain i senisim pasin na sarenda na dispela i lukim komyuniti i stap wantaim bel-isi na no gat ol bikpela hevi olsem kilim man indai i kamap.

Tude long hap ol ples long Trans-Gogol LLG na long Saut Ambenob planti ol yangpela man husat i save kukim hombru o ‘yawa’ i hangampim ol ges-silinda kontena long pablik ples long soim olsem komyuniti bilong ol i stopim pasin bilong dring hombru.

Planti ol mama na meri long ol viles long Trans-Gogol i tokaut olsem ol i pilim seif nau long wokabaut i go kam long gaden bikos ol bikhet lain i stopim pasin bilong katim na kilim indai man.

Long las wik Polis Minista Kramer i bin go long Trans-Gogol na i givim foapela nupela polis kar we polis bai yusim long mekim patrol long Trans-Gogol eria.  Ol dispela kar em sampela long 12-pela nupela polis kar em Polis Dipatmen wantaim Madang Distrik Divelopmen Atoriti (DDA) em MP Kramer i siaman long en i tok orait na bungim mani na i baim long helpim lo na oda long Madang distrik.

Minista Kramer i mekim strongpela toktok olsem taim lo na oda i stap gut em ol gavman sevis bai ran i go insait long ol ples na komyuniti i ken stap seif na amamas.

Em i tok olsem planti ol ‘kaikai man’ o lain bilong toktok planti i wok long yusim sosel midia na mekim kain kain toktok long gutpela wok em i mekim. Tasol em i tok sefti bilong ol pipel em bikpela samting.Taim ol pipel i stap seif na komyuniti i stap seif em ol bai gat gutpela tingting long mekim wok na kamapim divelopmen na senisim ples na tu senisim laipstail bilong famili, komyuniti, sosaiti na kantri bilong yumi PNG.

James G. Kila i raitim