MABA Geita, wanpela meri long Papa komyuniti long Hiri Wes, Sentral Provins i bin amamas tru long stori wantaim ol jenelis na soim nupela dres bilong em.

Maba em i wanpela bilong ol 10-pela meri long Veadi Papa Magi Sewing Group husat i bin kisim trening bilong samap long Boera komyuniti.

Em i tok tenkyu long dispela sans ExxonMobil PNG i bin givim em na ol arapela 9-pela.

Taim ol i bin kam bek long trening ol i bin trenim narapela 31 long pasin bilong samap na tu long stretim masin bilong samap.

Maba i tok pastaim Papa i bin gat 5-pela meri tasol husat i save long samap. Bihain long ol i kisim trening nau namba em i stap long moa long 40 husat inap samap. Na ol lain husat masin bilong ol i bin bagarap i ken stat samap gen.

Em i tok bipo ol i save painim ol lain long samapim dres bilong ol long lotu na ol bilas bilong bikpela de. Nau Papa komyuniti i no ken hatwok moa long painim ol lain long samap.

Bihain long ol trening Maba i bin kisim sans long samapim pes mask bilong ol tisa na sumatin long Papa Praimeri skul. Dispela i givim em strong long samap moa.

Namel dispela ol 31 tupela man tu i bin joinim trening bilong samap. Wanpela bilong ol man Kari Vani i tok bihain long trening ol i bin bungim 52 masin bilong samap na stretim 32. Bihain long dispela nau taim ol meri i lukim em na narapela man i wokabaut ol i save singautim tupela long stretim masin bilong ol.

Kari i tok planti hevi wantaim ol masin bilong samap i no bikpela tasol bikos ol meri i no save long stretim ol i save larim tasol i stap. Sampela dispela masin em bilong longtaim tru tasol mipela i stretim na ol I wok gen nau.

Nau yet ol memba long Veadi Papa Magi Sewing Group i no tingting long mekim dispela ol wok olsem liklik bisnis tasol ating bihaintaim bai ol i lukluk long en.

Rosa Koian i raitim