WOKS Dipatmen na ol independen odit kampani i mas sekim wok bilong ol konstraksen kampani i stretim ol rot long Madang taun, wanpela bipo senia opisa i tok.

Pastaim deputi Madang taun meya, Christopher Tomongo i tok gavman i mas save sapos dispela ol kampani i trupela kampani na i gat save long mekim rot o nogat.

Em i tok moa yet, mani ol i kisim inap long stretim gut na kamapim gutpela rot o nogat.

Em i mekim dispela tok long taim planti kampani i winim kontrak long stretim na apgredim ol rot long taun tasol dispela i no save stap longpela taim.

“Mi askim ol opisa bilong Woks Dipatmen long sekim wok bilong dispela ol konstraksen kampani sapos ol i mekim wok gut o nogat na sapos ol i gat ekspiriens long mekim kain wok olsem,” Tomongo i tok.

“Luksave i stap olsem bihain long wanpela o tupela mun taim ol kampani i stretim ol rot, ol rot bai bagarap gen.”

“Taim kampani i mekim gutpela rot, dispela bai stap longpela taim.”

Tomongo i askim tu ol opisa bilong provinsal gavman long painimaut bekgraun bilong ol kampani na sekim wok bilong ol.

“I luk olsem provinsal gavman na provinsal woks opis i no mekim wok bilong ol.

“Sapos ol i wok, i luk olsem ol i no wok bung wantaim.

“Planti mani i mas kamapim ol gutpela rot na bai ol manmeri i ken kisim gutpela sevis.”

Em i tok em i no stret na i asua taim ol i no kisim gutpela sevis long mani bilong ol.

Em i tok moa olsem ol draiva na papa bilong ol kar na PMV bas long Madang taun i wok long lusim planti mani long baim ol spea pat bilong ol kar na ol pasindia bilong ol kar i wok long pilim skin na bun pen long taim ol kar i kalap kalap na bam bam bikos long ol pothol.

“Madang taun em planti long Papua Niugini i save kolim ‘beautiful Madang’ o naispela ples tasol taim ol i lukim rot i bagarap em i no soim gutpela piksa o trupela stori bilong taun,” Tomongo i tok.

“Ol praivet rot kontrakta em Woks i save givim kontrak long mekim wok long stretim Madang taun rot tasol bihain long wanpela o tupela mun ol rot i bagarap gen.

Ol i save kapsaitim tasol karanas na taim bikpela ren i pundaun wara i save wasim ol karanas i go na pothol i save kamap gen.

Stanley Ganbangu, wanpela komyuniti lida na strongpela man bilong toktok long gud gavanens na pasin bilong rausim korapsen i tok ol politikal lida bilong Madang olsem Gavana Peter Yama na memba bilong Madang, Bryan Kramer i mas wok bung na stretim ol rot long gutpela divelopmen bilong taun.

James G. Kila i raitim