MOA long 100 papagraun i bin bung las wik long Kikori taim Mineral Risos Divelopmen Kampani (MRDC) na ol opisa bilong Benk ov Saut Pasifik i stat long opim akaun bilong ol klen memba husat bai kisim sea mani long PNG LNG Projek.

I gat tupela klen na ol i stap aninit long projek bilong PNGLNG Paiplain Segmen 6 Corridor klen na Segmen 7 Buffer zone klen.

Segemen 6 Corridor klen em ol klen i stap long boda bilong Sauten Hailans na Galp provins. Segmen 7 buffer zone em ol klen i stap long Kikori.

“Planti meri i bin kamap long sainim nem olsem signetri bilong ol klen akaun. Long wanpela klen, tripela yangpela meri i sain, na mi amamas long lukim dispela,” MRDC Klaen Sevis Jenerel Menesa Imbi Tagune i tok.

 Long dispela taim Buffer zone i bin opim 220 akaun wantaim planti meri husat i kisim lidasip wok. Ol bai kisim 30 pesen bilong 44.47 pesen long segmen 7.

 Na long Kikori bai gat 332 klen akaun bai op na ol bai kisim 15.53 pesen sea. I gat 9-pela bikpela klen grup long dispela segmen na 9-pela siaman bilong ol bai kam long nominesen na ileksen bilong dairekta husat bai makim ol long bod.

Taim olgeta dispela wok i pinis, olgeta benefiseri aninit long Paiplain Laisens namba 4 bai gat ol bek akaun na bod bilong ol. Na ol bai stat long kisim sea bilong ol long PNGLNG projek.